අදින්නයි දාන්නයි ඇතිවුන ආසාව

                           
                                             අවතාරුත්  කතාවක් ලියන්න පටන් ගත්තනේ ඒකේ කෑලි දෙක තුනක් එක දිගටම ගලපලා හිතුනා වෙනස් දෙයක් ලියන්න.කතාවක් ලියන එකත් සෙල්ලං නෑ නෙහ් .වැඩ්ඩා වගේ ලියන්න ගත්තට ලියාගෙන යද්දි තමා අමාරුව දැනෙන්නේ .නවකතාව සම්පූර්ණයෙන් හිතේ මවා ගෙන අවතාර් හෙන ගේමක් දෙනවා මේ දවස් වල ඕකට.කොහොමහරි වැඩේ අතාරින්නෙත් නෑ.පටන් ගත්තු විදිහටම ලස්සනට ලියන් යන්නයි අවතාර්ගේ බලාපොරොත්තුව.ඒක පැත්තකින් තියලා අද එකට බහිමු.
                                          අවතාර් ගේ A/L කාලේ ගැන ලියපු කෙමිස්ට්‍රි සර්ගේ ඇඩ් පාඩම  මතක ඇතිනේ.මේ කියන්න යන්නෙත් ඒ කාලේ සිද්දියක්ම තමා.අවතාර්ගේ පන්තියේ ඒ කාලේ ප්‍රෙඩෙක් හිටියා දිමා කියලා.ඇත්ත නම දාන්න බෑ මෑන් අවතාර්ගේ මූණූ පොතට සෙට් වෙලා ඉන්න නිසා .මේකත් ඉතින් ඇත්ත නම වගේම තමා පන්තියම කතා කලේ මිනිහට දිමා කියලා .කරන්න දෙයක් නෑ මේ නම නොදත් බෑ.අපි දිමා කියලම කියමු.මේ පොර ටිකක් පන්ඩිතයි.දෙන්නෙත් පන්ඩිත ටෝක්ස්.පන්ඩිතයට ඒ දන්ඩෙ යන්න බැයිලුනේ ඒ වගේ මූත් පන්ඩිත  කම හින්දම සමහර වෙලාවට නාගත්තා.

                           හැබැයි දිමා පන්ඩිත උනාට පුළුවන් උනේ කඩ්ඩ විතරයි.අනිත් ඒවත් පුළුවන් උනානම් එහෙම අපිට මෑන් එක්ක නිකමටවත් කතා කරන්න හම්බ වෙන්නේ නෑ.ඉස්කොලේ සයන්ස් ඩේ එක දවසේ ඩ්‍රාමා එකක සයන්ටිස්ට් ගේ රෝල් එක කොහොම හරි දිමාට හම්බ වෙලා තිබුනා.දිමා ඒක කලේ මාර ගැම්මෙන් ඇත්තටම සයන්ටිස්ට් කෙනෙක් වගේ.අපි කතා උනේ මෑන් ඩ්‍රාමා එකට හිටපු ඇඳුම පිටින්ම ගෙදරත් යයිද කියලා.
                 පන්තියේ හුඟක් වැඩ වලදි බලෙන්ම වගේ ඉදිරිපත් උනේ දිමා.අනික් අයත් සද්ද නැතිව හිටියා මිනිහට  ඉඩ දීලා.දවසක් ෆිසික්ස් පීරඩ් එකක  යාන්ත්‍ර විද්‍යාව පාඩමට මිස් ලැබ් එකෙන් පෙට්ටියක් එක්ක දුන්නක් පන්තියට දීලා කිව්වා   පාඩම අහගන්න ගමන් බලලා අතින් අත යවන්න කියලා.ඒ වෙනකොට දිමා හිටියේ පන්තියේ පිටිපස්සේ ඩෙස් එකක.කට්ටියම දුන්න අතට අරගෙන එහාට මෙහාට හරවලා ඇදලා එහෙම කරලා අතින් අත යැව්වා.අවසානෙදි දුන්න පෙට්ටියට දාලා දිමාම ෆිසික්ස් මිස්ට බාර දුන්නා.පස්සේ ඉන්ටවල් එක එහෙම ඉවර වෙලා මැත්ස් පීරඩ් එකද කොහෙද යනකොට ෆිසික්ස් මිස් එනවා යක්සාවේස වෙලා අර පෙට්ටියත් අතේ තියාගෙන.
 පස්සේ සර්ට මොනවද කියලා
  “ කරුණාකරලා මේ වැඩේ කරපු අය නැඟිටිනවලා .නැත්තම් මම ආයේ මේ පන්තිය පැත්ත පලාතේ එන්නේ නෑ උගන්නඩ “
 දැන් අපි බීරන්තට්ටු වෙලා බලන් ඉන්නවා මොකද්ද මේ හරුපේ කියලා.ඒ කියලා මිස් අර දුන්න පෙට්ටියෙන් එලියට ගත්තා.හත් ඉලව්වයි අපි අතට ගන්නකොට අඟල් 4/5 ක් තිබුනු දුන්නේ දිග ඩබල් වෙලා.ඒ මදිවට වැල මදුල වගේ එල්ලෙනවා.විලි ලැජ්ජාවයි.මැත්ස් උගන්වන සර් පන්ති භාර සර්.සර් ඉස්සරහම අපේ ගුණ වැයෙන්නයි යන්නේ.පන්තියම මීයට පිම්බා වගේ මීක් නෑ.ටික වෙලාවකින් දිමයි ඌට එහා පැත්තෙන් හිටපු  එකයි නැඟිට්ටා.
 “ ආහ් එනවලා මාත් එකක් යන්න “
       දිමාවයි අනිත් පොරවයි මිස් එක්කගෙන ගියා.පස්සේ දෙන්නා ආවට පස්සේ විස්තරේ අහගත්තා.දිමා ලස්සනට සිද්ධීය උන හැටි විස්තර කරනවා.මිස් උගන්වන වෙලේ දුන්න හම්බ උනහම දිමාට සාමාන්‍යයෙන් ඇදෙන ගාන මදි වගේ උනාලු.පස්සේ එහා පුටුවේ හිටපු පොරට අල්ලගන්න කියලා ටිකක් තදට ඇදලා.ඒ ඇදපු පාර එහෙම්මලු පස්සේ පෙට්ටියටම දාලා මිස්ට දීලා.මිසුත් බලන්නැතුව ලැබ් එකට දීලා.පස්සේ ෆිසික්ස් මිස්ට ලැබ් එකෙන් සද්දේ දාලා දුන්න ඇදලා හෙමින්ම ගෙනත් දුන්නා කියලා.මිස්ට අර විදිහට මල පැනපු එකට  පුදුම වෙන්න දෙයක් නෑනෙ.
             නියම සිද්දිය කියන්නේ ඒ දවස් වල උගන්නපු ජෙනරල් ඉංග්ලිෂ් වල තියෙන මගේ ජීවිතේ අමතක නොවන සිදුවීම  කියලා ලියන රචනාවට හරි අපූරුවට දිමා කඩ්ඩෙන් ඔය සිද්දිය ලියලා තිබිලා උගේ පොතක් අස්සේ තිබිලා හම්බ උනා.ලැජ්ජ නැති කම මහ මුදලි කමටත් වඩා ලොකුයි කිව්වලුනේ.

                        තව සිද්දියක් උනා  ෆිසික්ස්  ලැබ් එකේ.කතානායක මේ දිමාම තමා.ඉපිලුමට කරන ප්‍රැකිටිකල් වගයක් එදා තිබුනේ.කරුමෙට අවතාර් එදා සෙට් වෙලා තිබුනේ දිමාගේ කන්ඩායමට.කන්ඩායමේ කාටවත් පරික්ෂනේ කරන්න තියා බඩුවක් අල්ලනවත් හම්බ වෙන්නේ නෑ දිමා එක්ක.මොනවහරි කියලා ඒක ආපහු ගන්නවා.ටෙස්ට් ටියුබ් එකකට වැලි ටිකක් පුරවලා එක් වතුර භාජනේකට දාලා ටික ටික පඩි ටෙස්ට් ටියුබ්  එකට දාලා ගිලෙන උස මනින්නයි තිබ්බේ.දිමා පඩියෙන් පඩියෙන් දාලා පාඨාංක ටිකත් අරගෙන ඉවර උනා.තව පඩි ටිකක් අතේ ඉතුරුයි.
    “ ඒ බන් මේ ටිකත් දාලා බලමුද මොකද වෙන්නේ කියලා “
අපි එපා කිව්වත් ඌ කරන නිසා අපි බලන් හිටියා ඕන මඟුලක්  කියලා.දිමා දැන් ඉතුරු පඩි ටිකත් ටෙස්ට් ටියුබ් එකට දානවා.ටෙස්ට් ටියුබ් එක කට ගාවටම ගිලුනා.
“ දැන් ඇති ඕක තව දැම්මොත් ගිලෙනවා “ එකෙක් කියපි
“ පොඩ්ඩක් හිටපන්කෝ එහෙම ඉක්මනට ගිලෙන්නේ නෑ “ මූ අහන්නේ නෑ .කොහොමද විද්‍යාවයි කුතුහලෙයි එකට එක්කහු උනහම.විද්‍යාඥයෙක් පරීක්ෂණයක් කරනවා වගේ හෙන ගැම්මෙන් දැම්මා ඉතුරු පඩියත් ටෙස්ට් ටියුබ් එකට.දාන්නත් ටෙස්ට් ටියුබ් එක ගිලිලා සටස් ගාලා බීකරේ අඩියේ වැදිලා බිඳුනා.ඔන්න දිමා නැමැති මහා ප්‍රඥයා හොයා ගත්තා වතුර එකක තියෙන ටෙස්ට් ටියුබ් එකකට වැඩිපුර බර එකතු කරද්දි ගිලිලා අඩිය වැදිලා බිඳෙනවා කියලා.අපිට දැන් මලේ මල.ඇයි ඉතින් දැන් මුගේ පව් ටිකක් හරි අපේ කර පිටින් යනවනේ.පස්සේ මිස්ට වෙන එකක් කියලා වැඩේ ෂේප් කර ගත්තා.