ටියුබ්ලයිට් ලව් ඇන්ඩ් ෆන් ලයිෆ් (සතියේ ටොක්ක )

                          ඇඟට හිර වෙච්ච ඩෙනිම බොහොම අමාරුවෙන් බස්සගෙන අල්මාරිය  ඇරලා බැලුවේ ඒකට මැච් වෙන ටී ෂර්ට් එකක් ඇඳගෙන ඉක්මනට ගෝල් පේස් එකට යන්න.අරයා කොන්ක්‍රීට් බංකුවක් උඩට වෙලා  අන්නාසි පෙත්තක් හප හප මන් එනකම් මූද දිහා බලාගෙන ඇති.මම පරක්කු උනොත් එහෙම මුහුදේ පනීවිද දන්නෙත් නෑ.ඒ තරම් මට ආදරේ.ආහ් මේ තියෙන්නේ මම කැමතිම ටී එක.එයා එක්ක දවසක් අතේ එල්ලිලා  යන වෙලාවක කඩයක් ඇතුලට ගිහිල්ලා රැක් එකේ තිබ්බ මේ ටීෂර්ට් එක අත ගගා ලස්සනයි සුදූ කිව්ව විතරයි එයා ලෝභ නැතුව මට මේක අරන් දුන්නා.අන්න කොල්ලෝ.අදත් මම මේකම ඇඳන් යන්න ඕනේ සමහර විට එතකොට කොල්ලට ආසා හිතිලා තව එකක් අරන් දෙන්නත් බැරි නෑ.

                     ඔහ් මේ මොකද ?දවස් දෙකට මම මෙච්චර මහත් වෙලාද ? පෙරේදා අනිත් කෙනා එක්ක ෆිල්ම් එක බලන්න ගියෙත් මේකම ඇඳගෙනනේ.එතකොට අපූරුවට තිබුනනනේ.ඌ නම් මහ කුණා.මට ඇඳුමක් වත් අරන් දෙනවයැ.ඉඳලා ඉඳලා බඩගිනියි කිව්වොත් පෙට්ටි කඩේකට ගිහිල්ලා කිඹුල බනිස් එකයි තේ එකයි අරන් දෙනවා කන්න කියලා.ලස්සන හින්දා එහෙ මෙහෙ ගියාට මොකද මට දැන් හිතෙනවා ඒකට තිත තියන්න.එදාට මිනිහට තේරෙයි මේ කෙල්ලෙක්ගේ වටිනාකම.ඉන් අනිද්දට ගියපුවහම නම් අනිවාර්යෙන්ම ගානක් ගලවන්න ඕන මිනිහගෙන් සපත්තු දෙහෙකට.

                    මටත් පිස්සු .මේ කොහෙවත් යන එකෙක් ගැන හිතනවා.මගේ එක්කෙනා අහරේ වැල්ලේ වේලෙනවා ඇති මං එනකල්.දැන් මොකද කරන්නේ ටී ෂර්ට් එක ඇන්දට බඩෙන් අඟල් 2ක් 3ක් එලියේ.රෑට බත් කන එක නවත්තලා පාන් පෙත්තකින් ෂේප් වෙන්න ඕනේ.බොහොම අමාරුවෙන් හදා ගත්තු ෆිගර් එක අවුට් ගියොත් නම් ඉතින් ඊට හොඳයි මැරෙනවා.මේ ටී ෂර්ට් එක අඳිනවද ?වෙන එකක් අඳිනවද? එක්කෝ මේකම අඳිනවා.ඔය සාරි ඔසරි ඇඳලා ඔපිස් යන ගෑණු බඩවල් එලියේ දාගෙන යන්නේ ඕන තරම්.මම අඟලක් දෙකක් බඩ පෙන්නගෙන හිටියට තියෙන වැරැද්ද මොකද්ද.ටී ෂර්ට් එකත් දාගෙන බියුටි කල්චර් වැඩ වලට තව පැය භාගයක් විතර ලේට් වෙලා යන්තම් බස් හෝල්ට් එකට ආවා.ආවා කිව්වට ඇවිදින්නත් අමාරුයි වගේ ඩෙනිමයි ටී ෂර්ට් එකයි ඇඟේ සයිස් මනේ.

                                 අද බසුත් නැද්ද කොහෙද මගේ වෙලාවටම.අපි ලව් කරන්න ගියොත් ඉතින් පාරේ දුවන බසුත් හරහට හිටිනවා.ඈහ් අර බෑග් එකක් කරේ දාන්න ඉන්න කොල්ලා මං  දිහා බලන් ඉන්නවා නේද කන්ඩ වගේ.උගේ ඇස් දෙකත් උඩ ගිහිල්ලා මට පිටිපස්සෙන් මහසොන් පිල්ලියවත් ඉන්නවද.කෙල්ලෙක් ඇඟට හිරට ඩෙනිමක් ටී ෂර්ට් එකක් ඇඳලා ගියොත් මුන්ට මැජික්.මුන් කම්මැලිකමට හින්දි ෆිල්ම් එකක්වත් බලන් නැද්ද මන්දා.ඒවගේ ඔය ඔනතරම් කොටට හිරට ඇඳලා කෙල්ලෝ ඉන්නේ.මුන් ඉන්නේ තවම රජ කාලේ මානසිකත්වයේ.ළඟට ගිහින් දෙකක් කියන්නත් හිතයි ඇස් කටේ හිටින්න.ඒත් ඉතින් මේ සෙනඟ ගොඩේ කොල්ලෙක්ව නෝන්ඩි කරන එකත් හරි නෑනේ.බස් එක එනවා දැකලා කිටි කිටියේ සෙනඟ හිටපු බස් එකට ගොඩ උනා මෑන්ව අමතක කරලා.

       “ හප්පේ නංඟි උඩට නඟින්න උඩට නඟින්න වැටුනොත් එහෙම විනාසයි “ කොන්දා කෑ ගහනවා.මූට පිස්සුද මන්දා.මම ආසාවට ෆුට් බෝඩ් යනවයැ.උඩට නඟින්න පුළුවන් නම් වෙව්ල වෙව්ල ෆුට් බෝඩ් එකට වෙලා ඉන්නවද?කෝකටත් ටිකක් ට්‍රයි කරලා උඩට රිංගන එක හොඳයි.මට ෆුට් බෝඩ් එකේ ඉඳන් පහල බැලෙන කොට කලන්තේ වගේ.කොහොමත් මම ගෙදර ෆෑන් එක දාලා තියද්දි ෆෑන් එක දිහාවත් බලන්නේ නෑ.එතකොටත් මට නිකන් කැරකැවිල්ල වගේ .මගේ ෂේප් ෆිගර් එකටයි හැට හතර මායමටයි පින් සිද්ධ වෙන්න ඉඩ අරගෙන නැග්ගා උඩට.ටික දුරක් යද්දි බස් එකේ සෙනඟ අඩුඋනා බලන් ඉද්දි.අපරාදේ අච්චර ගේමක් දීලා උඩට නැග්ගේ.ෂහ් නියමයි සීට් එකේ හිටපු ඇන්ටිත් නැගිට්ටා බහින්න වගේ .දැන් දෙයියනේ කියලා ඉඳගෙන යතහැකි.

                              සීට් එක එහා පැත්තේ සූකිරි පාට කොල්ලෙක්.ඉඳගද්දිම දාපු පානි හිනාව.මටත් මොකද මට නෙවේ වගේ පාඩුවේ ඉඳගත්තා.මම දැන් අර මගේ එක්කෙනා ගැන හිත හිත ඉන්නවා.අදනම් අන්නාසියි පොරියි එපා කියන්න ඕනේ.කන්න ඕනේ ඩීසන් කෑමක් ටිකක් ගනන් අයිස් ක්‍රීම් එකක් කන්න ඕනේ ගියපු ගමන්ම.

.................................සරාරාරාරාරාස්................................

                          ඩ්‍රයිවර් අයියා බ්රේක් එක ගහලා වංගුව ගත්තු ගැනිල්ලට ගෝල්පේස් එකේ හිටපු මම අර කොල්ලගේ කරේ.දනි පණිගාලා ආයේ සීට් එකට බැස්සා.මිනිහා දැන් දාපු හිනාවට මාත් හිනාවක් දැම්මා.ඇයි ඉතින් මිනිහා මට කර දුන්න එක හරි වටිනවනේ.නැත්තම් මම බස් එකෙන් එලියේ මෙලහකටත්.

“ නංඟි හැමදාම මේ බස් එකේම ද යන්නේ “ මෙන්න මූ එකපාරටම අහපි

“ නෑ අයියේ මේ පාරේ දුවන තව බස් තියනවනේ “

“ නෑ නංඟි මම නිකන් ඇහුවේ .මට නිකන් නංඟිව දැකලා පුරුදුයි වගේ“

“ ඇත්තට එහෙනම් ඒ මං වගේ වෙන කෙනෙක් වෙන්නැති “

              ඒ පාර නම් මෑන් පරාජය බාරගත්තා වගේ.ආවා මාව තම්බන්න.බස් එකේ ගහන බ්රේක් පාරකට ගිහින් ඇඟේ වැදුනත් මේ අය හිතන්නේ ඒ කෙල්ලව අල්ලන්න පුළුවන් කියලා.ටික වෙලාවක් සද්ද නැතුව හිටපු මිනිහා ආයෙත්,

“නංඟා තරහ නැතුව ඔයාගේ සෙල් එක පොඩ්ඩකට දෙනවද?මට ඉමජන්සි කෝල් එකක් ගන්න ඕනේ වෙලාවට මගේ එකේ බැටරි ගියානේ “

“ අනේ අයියා සොරි මම කාටවත් එහෙම දැකපු පලියට සෙල් එක දෙන්නේ නෑ .අනික අපි මේවට කාඩ් එකක් දාගන්නෙත් බොහොම අමාරුවෙන් “

“ හා හා නංඟි කැමති නැත්තම් කමක් නෑ “

                 බහින තැනත් ළඟයි දන්නෙම නැතුව.බහින්න නැගිටින්න කලින් මූට හොඳවගෙන් කියන්න ඕනා.

“ අයියේ මම මේ යන්නේ මම යාලුවෙලා ඉන්න කෙනා හම්බෙන්න.ඒක හින්දා මට ඔයාගේ නම්බරෙන් වැඩකුත් නෑ.ඔයාට මගේ නම්බරෙන් වැඩකුත් නෑ.යන්නම් “

           

පලි : ටොක්ක වැදුනු අය අවතාර් එක්ක තරහ වෙන්ඩ එපා ඈ.විසේසයෙන් බවලත් උදවිය .ඕන කෙනෙක්ට ඕන දෙයක් මේ ගැන කියලා යන්න අවසර තියෙනවා .අවතාර් මේ දවස්වල කතාවකුත් ලියනවනේ මිලින වූ සඳ කියලා.ඒකේ ඊළඟ කොටසත් ළඟදීම දෙනවා.